महायुतीला पहिला धक्का  मित्रपक्ष राष्ट्रीय समाज पक्ष महायुती बाहेर 

मुंबई प्रतिनीधी / भारत कवितके : विधानसभा निवडणुकीच्या तारखांची घोषणा झाल्यानंतर 24 तासांमध्येच महायुतीला पहिला धक्का लागला आहे. महायुतीमधून पहिला मित्रपक्ष बाहेर पडला आहे. राष्ट्रीय समाज पक्षाचे नेते आणि माजी कॅबिनेट मंत्री महादेव जानकर महायुतीच्या बाहेर पडले आहेत. प्राथमिक माहिती अशी की, आमदारकीची टर्म पुन्हा न मिळाल्यामुळे महादेव जानकर नाराज होते. महायुतीमधून बाहेर पडल्यानंतर महादेव जानकर विधानसभा निवडणूक स्वबळावर लढणार आहेत. आज झालेल्या महायुतीच्या पत्रकार परिषदेलाही महादेव जानकर उपस्थित नव्हते.

लोकसभा निवडणुकीमध्ये महायुतीने महादेव जानकरांसाठी एक जागा सोडली होती. परभणीमधून महादेव जानकर निवडणुकीच्या रिंगणात उतरले होते, पण त्यांना पराभवाचा धक्का बसला होता. लोकसभा निवडणुकीवेळीही महादेव जानकर महाविकास आघाडीसोबत जायच्या तयारीत होते, यासाठी त्यांची शरद पवारांच्या राष्ट्रवादीसोबत चर्चाही सुरू होती, पण शेवटच्या क्षणी महादेव जानकर यांनी महायुतीसोबत जायचा निर्णय घेतला होता.