नगरच्या जनतेचा आधारवड हरपला : माजी आमदार अरुणकाका जगताप यांचे निधन

विशेष प्रतिनिधी / गंगासागर पोकळे : अहिल्यानगरचे माजी नगराध्यक्ष व विधानपरिषद चे माजी आमदार अरुणकाका बलभीम जगताप यांच्या निधनाची बातमी अत्यंत दुःखद व नगरकरांच्या मनाला चटका लावणारी आहे. अहिल्यानगरच्या राजकारणात, समाजसेवेत त्यांचे अमूल्य असे योगदान आहे. काकांचे आज दि. 2 मे रोजी अल्पशा आजाराने निधन झाले. पुणे येथील एका खासगी रुग्णालयात उपचार सुरू असताना त्यांची प्राणज्योत मालवली. ते 67 वर्षांचे होते. अरुणकाकांच्या निधनाच्या वृत्ताने अहिल्यानगर शहरासह जिल्ह्यात शोककळा पसरली आहे.

अरुणकाका जगताप यांचं पार्थिव राहत्या घरी सारसनगर येथे अंतिम दर्शनासाठी ठेवण्यात येणार असून त्यांच्या पार्थिवावर अहिल्यानगर येथील स्मशानभूमीत अंत्यसंस्कार करण्यात येणार आहेत.मागील काही दिवसांपासून पुणे येथे खाजगी रुग्णालयात अतिदक्षता विभागात त्यांच्यावर उपचार चालू होते. तज्ज्ञ डॉक्टर त्यांच्यावर उपचार करत होते. आज त्यांची प्राणज्योत मालवली.

अरुणकाका जगताप हे नगरच्या राजकारण आणि समाजकारणात काका नावाने परिचित होते. त्यांच्या पश्चात पत्नी पार्वती, मुले राष्ट्रवादी काँग्रेसचे आमदार संग्राम जगताप, माजी जिल्हा परिषद सदस्य सचिन, सुना, नातवंडे असा परिवार आहे. भाजपचे राहुरीचे आमदार शिवाजीराव कर्डिले, भानुदासजी कोतकर यांचे ते व्याही होते. अरुणकाका जगताप यांची राजकीय कारकीर्द ही काँग्रेसमधून सुरू झाली. युवक काँग्रेसचे अध्यक्षपद त्यांनी भूषविले होते. अहमदनगरपालिकेचे नगराध्यक्षपदही त्यांनी भूषविले आहे. जिल्हा क्रिकेट संघटनेचे ते अध्यक्ष होते. तसेच गुणे आयुर्वेद शैक्षणिक संस्थेचे ते अध्यक्ष होते. अरुणकाका जगताप हे राष्ट्रवादी काँग्रेसकडून सलग दोनवेळा स्थानिक स्वराज्य संस्थेतून विधानपरिषदेवर निवडून गेले होते. काकांच्या निधनाच्या वृत्ताने नगरकरांवर शोककळा पसरली आहे.

अंतिम पार्थिव दर्शन-

आज, शुक्रवार दि. २ मे २०२५ रोजी दुपारी २ वा. निवासस्थानी, भवानीनगर, अहिल्यानगर

अंत्यविधी-

आज, शुक्रवार दि. २ मे २०२५ रोजी दुपारी ४ वा.अमरधाम, अहिल्यानगर

अंत्यविधी मार्ग

भवानीनगर, निवासस्थानापासून महात्मा फुले चौक – मार्केटयार्ड- जिल्हा सहकारी बँक – स्वस्तिक चौक- टिळक रोड मार्गे – आयुर्वेद कॉलेज बाबावाडी -नालेगाव – अमरधाम.